Усё далей адыходзіць у гісторыю той пераможны векапомны май. Але не гасне памяць пра часы жорсткіх вы­прабаванняў, пра мужных абаронцаў, якія не сталі на калені перад ненавісным ворагам, а са зброяй у руках адстойвалі свабоду і незалежнасць народаў, набліжалі шчаслівы дзень пачатку адліку новага, мірнага жыцця. Ёсць нямала слаўных дат у гісторыі роднай Беларусі, і ўсё ж 9 Мая – асаблівы дзень, свята ўсіх святаў вось ужо на працягу 65-ці мірных гадоў. І пакуль стукаюць нашы сэрцы, бу­дзе жыць памяць аб салдатах Перамогі.

Абласное свята, прысвечанае 65-годдзю Перамогі ў Вялікай Айчыннай вайне “Паклонімся вялікім тым гадам” прайшло ў Маладзечне 8 мая. У гэты дзень маладзечанцаў і гасцей горада – а на ўрачыстыя мерапрыемствы былі запрошаны дэлегацыі з усіх раёнаў Міншчыны – чакала насычаная праграма. Прадстаўнічай была і дэлегацыя нашага раёна на чале са старшынёй райвыканкама А.С.Бойка. Удзельнікі свята ўсклалі кветкі і вянкі да стэлы воінам-вызваліцелям. Прайшла ўрачыстая цырымонія ўзнагароджвання ветэранаў, сярод якіх быў і наш зямляк Х.І.Абрамовіч. Старшыня Мінаблвыканкама Л.Ф.Крупец шчыра віншаваў сівых абаронцаў Айчыны, якія не па загаду, а па наказу сэрцаў усту­пілі ў схватку з фашыстамі, зычыў ім здароўя і даўгалецця. Сапраўдным падарункам стаў святочны канцэрт. Больш за 150 самадзейных артыстаў Клеччыны выступілі на шматлікіх пляцоўках горада. Пакарылі гледачоў вакальныя здольнасці ўдзельнікаў дзіцячай народнай студыі “Натхненне” і дзіцячага вакальнага ансамбля “Надзея” раённага Цэнтра культуры. Цэнтральнай па­дзеяй стаў марш-парад духавых аркестраў “Дарогамі вайны” па вуліцах Маладзечна і гала-канцэрт духавой музыкі “Майскі вальс”, у якім былі задзейнічаны 27 калектываў. Ярка выступілі духавы аркестр Клецкай дзіцячай школы мастацтваў і зводны духавы аркестр РЦК і РА НС.

Вольга Русіновіч.

Фота аўтара.